Betra samfélag með jákvæðni, fagmennsku og samvinnu að vopni
Með stuðningi við Specialisterne styðja Reitir við fjölbreytni í atvinnulífinu sem og bætt lífsgæði einhverfra á Íslandi. Specialisterne vinna að því að bæta virkni og atvinnuhorfur einstaklinga á einhverfurófi. Skjólstæðingarnir eru ungt fólk sem hvorki stundar nám né vinnu. Samtökin styðjast við einstaklingsmiðaðar þjálfunaráætlanir og leggja áherslu á stundvísi og mætingu. Markmiðið er atvinnuþátttaka eða nám. Specialisterne eru á meðal þeirra samtaka sem njóta stuðnings Reita í formi húsnæðis.
Specialisterne hafa notið stuðnings Reita í formi húsnæðis frá stofnun samtakanna árið 2011.
Allt daglegt starf Reita er byggt á gildum félagsins, jákvæðni, samvinnu og fagmennsku og áhersla er lögð á að framfylgja stefnu félagsins um samfélagslega ábyrgð en í henni er m.a. að finna ákvæði um mannréttindi, siðferðisviðmið félagsins, meðferð trúnaðarupplýsinga, og stefnu félagsins og viðmið í umhverfismálum. Hjá Reitum er lögð áhersla á ábyrgt val á verk- og leigutökum, m.a. til að sporna við því að mannréttindabrot eigi sér stað í tengslum við starfsemi félagsins. Með það að markmiði hefur ákvæðum gegn mannréttindabrotum verið bætt inn í leigusamninga og verksamninga félagsins.
Hjá Reitum er lögð áhersla á gott vinnuumhverfi og jákvæð samskipti á vinnustað. Nýlega var innleidd stefna og viðbragðsáætlun gegn einelti, áreitni og ofbeldi með það að markmiði að koma í veg fyrir slíkt í starfsemi Reita sem og að tryggja að úrræði séu til staðar telji aðili sig hafa orðið fyrir slíkum brotum.
Jákvæðni, fagmennska og samvinna
Reitir styðja rausnarlega við starfsemi UN Women, Unicef og Erindis, samtaka um samskipti og skólamál, ásamt því að styðja við starfsemi fleiri samtaka. Með því að leggja starfseminni til húsnæði gerum við þessum félögum kleift að beina kröftum sínum og fjármagni að því að bæta samfélagið.
Árið hjá Reitum
-
Hótel Grímur opnað í Grímsbæ
Á hótelinu eru 20 herbergi, þ. á m. fjölskylduherbergi, sem ætlað er að höfða til hins hagsýna ferðamanns sem ferðast um á bílaleigubíl. -
Hveragerðisbær fékk nýjar skrifstofur
Bæjarskrifstofa Hveragerðisbæjar flutti á haustmánuðum í algjörlega endurnýjað skrifstofuhúsnæði við Breiðumörk 20. Skrifstofurnar voru áður í verslunarmiðstöðinni við Sunnumörk, sem einnig er í eigu Reita, en þar skapaðist aukið rými fyrir Almar bakara til að opna kaffihús í kjölfarið. -
Hugmyndasamkeppni um skipulag Kringlusvæðisins
Kanon arkitektar voru hlutskarpastir með tillögu sem þykir sýna einfalda reitaskiptingu sem fellur vel að hefðbundnu byggðamynstri borgarinnar og skapar sterka heild. Borgarlínustöð er staðsett við Kringlumýrarbraut og getur þá bæði þjónað Kringlusvæðinu og Menntaskólanum við Hamrahlíð. Húsareitir eru ferningslaga með rúmgóðum, opnum inngörðum. Gert er ráð fyrir allstóru almenningsrými á miðju svæðisins. -
Reitir kaupa atvinnusvæði á Blikastöðum
Áætlað er að byggingarmagn á þessu u.þ.b. 15 ha. svæði verði um 75 til 110 þúsund fermetrar á næstu 8-12 árum. Kaupin skapa tækifæri til frekari fjárfestinga fyrir Reiti og opna á tækifæri til að bjóða upp á fleiri valkosti til að uppfylla húsnæðisþarfir núverandi og nýrra viðskiptavina en áður hefur verið. -
Hugmyndasamkeppni um byggð við Laugaveg 168 til 176
Yrki arkitektar báru sigur úr býtum í keppninni sem haldin var af Reitum ásamt Reykjavíkurborg, AÍ og Heklu. Vinningstillagan þykir sýna byggð með látlaust yfirbragð, þar sem fíngerð randbyggð fellur vel að því byggðamynstri sem fyrir er. Tillagan býður upp á mikinn sveigjanleika til frekari þróunar í sterku heildarsamhengi. -
Klettháls 3 bætist í eignasafnið
Á haustmánuðum festu Reitir kaup á um 1.700 fermetra atvinnuhúsnæði að Kletthálsi 3, en leigutaki þar er Arctic Trucks. -
30 ára afmæli fagnað
Reitir fögnuðu 30 ára afmæli á haustmánuðum 2017. Reitir rekja upphaf sitt til byggingar Kringlunnar árið 1987 og hefur saga Reita og Kringlunnar verið samofin síðan. Helgina 19. til 22. október fagnaði Kringlan afmælinu með glæsilegum afmælistilboðum, skemmtiatriðum og veitingum fyrir gesti. -
TOYS R US, Nespresso og Selected á meðal nýrra verslana í suðurenda Kringlunnar
Með breytingum á fyrstu hæð Kringlunnar urðu til tvö ný verslunarrými þar sem 17 sortir og Kúnígúnd hafa tekið til starfa. G-Star RAW opnaði verslun í suðurenda og Dressmann var opnuð á ný eftir algjöra endurnýjun verslunarinnar. -
Café París endurnýjað
Á vormánuðum var Café París opnað á ný eftir viðamiklar endurbætur á þessu húsnæði sem hefur hýst kaffihús síðan 1992. -
Ný H&M, Hagkaup og Next í stórbættum norðurenda Kringlunnar
Endurbætur á verslunarrýmum í norðurenda Kringlunnar eru á meðal umfangsmestu framkvæmda sem unnar hafa verið innanhúss í Kringlunni frá byggingu hennar árið 1987. Uppgerða verslunarrýmið er rúmlega 7.000 fermetrar að stærð. Útisvæðið og báðir inngangar norðanmegin voru endurbættir sem og þjónustuborðið.
